من عصفور أزرق إلى الدوجكوين

ماسك يكتسح ساحة الترند وحديث العالم من جديد! بس المرة ذي كانت نتيجة تغيير شعار تويتر بصاحب الميم الشهير الكلب Doje

اكيد كلنا نعرف هالميم الساخر ونستخدمه بس هل كلنا نعرف إنه كان مصدر إلهام لإنشاء عملة رقمية وتم شراءه بما يقارب ال٤ ملايين دولار؟ ايه نعم عزيزي القارئ ٤ مليون دولار!!

2013 كانت بداية قصة ميم الكلب من نوع "شيبا إنو" وصاحب الالتقاطة المهندس جاكسون بالمر اللي كان ذاك الوقت مهتم بالعملات الرقمية واخبارها، نشر بالمر وقتها تغريدة ساخرة تنصح بالاستثمار في الدوجكوين لأنها حتكون القنبلة الجاية!

حصدت التغريدة تفاعل قوي وتعليقات مؤيدة لحديثه ووقتها قرر بالمر إنه يشتري ال Dogecoin.com اللي انشهر وانتشر بشكل واسع في منتدى النقاشات العالميReddit

اتفق بالمر مع مهندس برمجيات اسمه بيلي ماركوس اللي كان عنده مسبقًا مشروع عملة رقمية واتشاركو الاثنين واطلقو لنا هذه العملة الساخرة "عملة الدوج كوين"

بعد ما تم اطلاق العملة ازداد التعامل بيها بشكل كبير خصوصًا انها كانت تعتبر عملة للتعبير عن الشكر أو هدية بسيطة.

في 2019 ظهرت التغريدة اللي غيرت المشهد بشكل كلي وقتها، ومين يا ترى كان هذا المغرد؟ إيلون ماسك ولا غيره وقال فيها إن الدوج كوين عملته الرقمية المفضلة، ورجع في 2020 بتغريدة ثانية مرتبطة بالنظام المالي العالمي وكانت حديث العالم وظهر فيها كلب الشيبا إنو

ومن ذاك الوقت ارتفعت قيمة العملة بشكل جنوني خصوصًا انه كان كثير من المشاهير يستخدموها وعلى رأسهم ماسك واللي كان يتحدث عنها باستمرار ناصح الكل بالتعامل بيها، لدرجة إنه أعلن كمان عن إمكانية شراء سيارات تيسلا عن طريقها وتمويل مهمة الفضاء لشركته SpaceXعن طريق العملة قائل إنها بتكون أول عملة توصل لسطح القمر

أما اليوم فحلقت العملة وارتفعت قيمتها حول ال30% من هذه الحركة بس!!

ومن هنا نفهم علاقة ايلون ماسك بكلب الشيبا إنو واقتران اسمه بها وسبب اختياره كشعار لتويتر أو نقدر نقول Dogitter زي ما سبق ووعدنا 😉

ختامًا، لازم تعرفو وتحرصو ان الاستثمار في هذه العملة يكون استثمار حذر زي ما صرّح ماسك بنفسه، وأهم شي تكون بفوائض مالية ومو بمدخراتكم أو قروشكم الأساسية